"Хөрөнгө нь бялхсан жил" - Дэлхийн хамгийн чинээлэг 500 хүний нийт хөрөнгө 2024 онд $10 их наядын босгыг давжээ

ТЭРБУМТНУУД БА “ТЭРГҮҮН АНД”

АНУ-ын технологийн салбарын хувьцаануудын зогсолтгүй өсөлт Илон Маск, Марк Закерберг, Женсен Хуан, Жефф Безос, Ларри Эллисон, Майкл Делл, Ларри Пэйж, Сергей Брин зэрэг магнатуудын хөрөнгийн хэмжээ цойлох гол түлхэц болжээ. Зөвхөн эдгээр найман тэрбумтны хөрөнгө л өнгөрсөн онд 600 тэрбум гаруй ам.доллароор нэмэгдсэн байна. “Bloomberg”-ийн тэрбумтнуудын индексэд бүртгэлтэй 600 хүний хөрөнгө 1.5 их наяд ам.доллароор өссөний 43 хувийг нь дээрх тэрбумтнууд бүрдүүлжээ.

АНУ-ын Ерөнхийлөгчөөр сонгогдсон Дональд Трампын “тэргүүн анд” хочтой болоод буй Илон Маск 2024 онд санхүүгийн амжилтаараа бүх тэрбумтнуудыг илүүрхсэн байна. Удахгүй албан тушаалаа авах Ерөнхийлөгчтэй ойрын харилцаатай байсан нь түүний компаниудын үнэлгээ өсөхөд дэм болж, оны эхэнд 213 тэрбум ам.доллар байсан хөрөнгө нь 442.1 тэрбум ам.доллар  хүрээд байна.

12 дугаар сарын 17-ны байдлаар Илон Маскийн хөрөнгө Жефф Безосынхоос 237 тэрбум ам.доллароор илүү болсон байв. “Bloomberg”-ийн индексэд тэргүүлэгч болон удаах эрхмийн хөрөнгийн зөрүү өмнө нь ийм их байсан түүхгүй аж.

ЯЛАГЧИД

Дональд Трамп

 Дийлэнх хувьцааг нь эзэмшдэг “Trump Media & Technology Group” маш сайн гүйцэтгэлтэй байснаар түүний хөрөнгө 2024 онд урьд байгаагүй өндөр түвшиндээ хүрчээ. Сошиал медиа компанийн одоогийн зах зээлийн үнэлгээ долоон тэрбум гаруй ам.доллароор хэмжигдэж байна.

Женсен Хуан

Өнгөрсөн онд нийт хөрөнгө нь 76 тэрбум ам.доллароор нэмэгдсэн тул “Nvidia”-ийн Гүйцэтгэх захирал хиймэл оюуны үр ашгийг хамгийн ихээр хүртсэн эрхмээр тодорч байна. “Nvidia”-ийн хувьцааны ханш 2024 онд бараг гурав дахин өсөж, 2024 оны зургаадугаар сард дэлхийн хамгийн өндөр үнэлгээтэй компани болсон юм.

Дэлхийн хамгийн чинээлэг 5 гэр бүл

Дэлхийн хамгийн чинээлэг 5 гэр бүл

Уолтоны гэр бүл

“Walmart”-ийн анхны салбар нээгдсэнээс 62 жилийн дараа Уолтоны удам урьд урьдынхаас илүү чинээлэг болжээ. Гэр бүлийнх нь нийт хөрөнгө 432.4 тэрбум ам.доллар хүрснээр “Bloomberg”-ийн хамгийн чинээлэг гэр бүлүүдийн эрэмбэд тэргүүн байраа буцаан авсан байна.

Хятадын тэрбумтнууд

“Tencent”-ийн Гүйцэтгэх захирал Пони Ма, “Xiaomi”-ийн Төлөөлөн Удирдах Зөвлөлийн дарга Лэй Жунь, “Cambricon”-ийн хамтран үүсгэн байгуулагч Чэнь Тяньши нар 2024 онд нийт хөрөнгөө 14 хувиар өсгөсөн байна. Үл хөдлөх хөрөнгийн зах зээлийн хямрал, мөн Ши Жиньпиний хамтын хөгжил цэцэглэлтийн бодлогын улмаас гурван жилийн турш буурсан БНХАУ-ын тэрбумтнуудын хөрөнгө 2024 оноос сэргэж эхэлжээ.

АЛДАГСАД

Тансаг зах зээлийн франц тэрбумтнууд

“LVMH”-ийн Бернар Арно, “L'Oreal”-ийн Франсуаз Беттенкур-Майерс, “Kering”-ийн Франсуа Пино нарын хөрөнгө 2024 онд ихээхэн дүнгээр хорогджээ. Ресторан, энтертайнмент салбарын хоосон орон зайг тансаг бүтээгдэхүүний худалдан авалт нөхсөн цар тахлын жилүүдийн дараа дэлхий даяар, ялангуяа гол зах зээл БНХАУ-д борлуулалт саарснаар дээрх гурван тэрбумтны хөрөнгө 71 тэрбум ам.доллароор буурсан байна.

Колин Хуан

БНХАУ-ын тэрбумтнуудын дунд хамгийн их хөрөнгөө алдсан нь Колин Хуан болж байна. Цахим худалдааны Temu платформын ард байдаг тэрбээр наймдугаар сард хэсэгхэн хугацаанд БНХАУ-ын хамгийн баян хүн болсон хэдий ч улирлын тайлан нь урам хугалсны улмаас компанийнх нь  хувьцаа ганцхан өдөрт 29 хувиар унаж, улмаар Колин Хуаны хөрөнгийн хэмжээ оны эцсийн байдлаар 18 тэрбум ам.доллароор буурсан байна.

Фам Нат Выонг

Үл хөдлөх хөрөнгө, жижиглэн худалдаа, эрүүл мэнд гээд олон салбарт хүч үздэг Вьетнамын могул өнгөрсөн онд нийт хөрөнгийнхөө бараг тэн хагасыг алджээ. Түүний эзэмшдэг цахилгаан автомашины “Vinfast” компанийн тэлэлтийн төлөвлөгөө хэт эрчимтэй байж, алдагдал нь нэмэгдсэний улмаас хувьцааны ханш нь оны эхээр 70 гаруй хувиар унасан юм.