Хүүхдэд хэзээнээс ном уншиж өгч болох вэ?

Яг хэзээнээс хүүхдэд ном уншиж өгч болох бол гэсэн асуулттай ээж аавууд тулгардаг.

Энэ асуултад хариулахад хэтэрхий эрт гэсэн ойлголт байдаггүй. Учир нь хүүхэд эхийн хэвлийд байхаасаа л ээжийнхээ хоолойг сонсон таньж эхэлдэг. Тиймээс бид хүсвэл хүүхдээ төрөөгүй байхад ном уншиж өгч болно.

Хүүхэд дуу чимээг хэзээ сонсож эхэлдэг вэ?

Хүүхдийн таван мэдрэхүй эхийн хэвлийд байхаас хөгжиж эхэлдэг. Арван долоон хоногтойгоос хүүхдийн сонсголын систем хөгжинө. Ураг ээжийнхээ дууг сонсож чаддаг. Ойролцоогоор 24, 26 дахь долоо хоногтойгоос хүүхэд ээж, аавынхаа дуу хоолой, хөгжим зэрэг гадаад орчны чимээг сонсож эхэлдэг.

Тиймээс та хүүхдэдээ хэвлийд байхад нь ном уншиж өгөөрэй. Хүүхэд төрсний дараа ч үргэлжлүүлэн ном унших нь маш чухал. Хэдий хүүхэд таны хэлж байгааг ойлгохгүй ч таны хоолойг сонсоод хүүхдийн аливаа дуу чимээ сонирхох, сонсох чадварыг хөгжүүлдэг. Мөн хүүхдэд тогтмол ном унших нь балчир наснаас нь номтой нөхөрлөх дадал суулгах төдийгүй ном унших болгондоо таатай сайхан мэдрэмж авах үндэс болдог.

Хүүхэд яагаад багаасаа ном унших нь тустай вэ?

Хүүхэд номоо тантай хамт унших, таны уншихыг сонссоноор түүний сэтгэн бодох чадвар маш их хөгждөг. Мөн хүүхдийн үгийн санг баяжуулж, харилцааны ур чадварыг нь сайжруулдаг. Ном уншсанаар хүүхэд үсэг, тоо, хэлбэр дүрс, өнгөний талаар ойлголтуудтай болдог юм.

Тэгвэл нярай хүүхдэд ямар номыг уншиж өгөх вэ?

Эхний саруудад хүүхэд ямар нэг түүхээс илүү авиа, хэмнэлийг илүү анхаарч сонирхдог. Тиймээс бид өөр өөр утгатай, цөөн номыг дахин дахин уншиж болно. Давтан унших нь суралцах арга барилын үндсэн хэлбэр учир нэг номоо олон удаа унших нь хүүхдэд хуудас болгоны зураг, үгийг тогтоож ойлгох боломж олгоно.   

Хүүхэд нялхдаа ямар нэг номыг бусад номоос илүүд үзэх тухай ойлголтгүй. Гэвч та аяндаа хүүхэд зурагтай номд дуртай байна уу эсвэл хүрч тэмтэрч онгойлгож, хааж болох зүйлстэй ном илүүд үзэж байна уу гэдгийг төвөггүй мэднэ.

Эхний саруудад бага эхтэй, том зурагтай, хоёроос дөрөв хүртэл хуудастай ном сонгоорой. Нярай хүүхдүүд амьтдын тухай номд дуртай байдаг. Ойролцоогоор есөн сартайгаасаа хүүхэд хамт уншсан номуудаа ганцаараа эргүүлэн, гүйлгэн хардаг.

Гэхдээ энэ үед нимгэн хуудастай ном өгөхөөс аль болох татгалзаарай. Учир нь хүүхэд ямар нэгэн зүйлийг амандаа хийж, хүрч тэмтэрч үзэх нь түгээмэл. Тиймээс аль болох зузаан, хатуу хуудастай ном тохиромжтой.

Ямар хугацаагаар ном унших нь тохиромжтой вэ ?

Хүүхдийн сонирхол буурах үед л та өөр зүйл хүүхдэдээ санал болгоорой. Тэгэхээр эхэндээ хүүхэдтэйгээ ном унших хугацаа маш богино байна гэсэн үг.

Одоо танд нярай хүүхдэд хэрхэн ном унших зөвлөгөөг санал болгоё.

•Нярайн эхний саруудад хүүхдээ тэврэнгээ ном уншиж өгч байгаарай. Мөн уншиж байгаа зүйлсээ эсвэл бага хэмжээний шүлгийг дуу болгон дуулж болно.

• 3-6 сартайдаа хүүхэд хүний царай, өнгө, хэлбэр дүрсийг ажиглах дуртай. Хүүхэд энэ үед маш их чимээ гаргаж, харж байгаа зурагтаа хүрч үзэхийг хүсдэг. Энэ үед та зураг ихтэй, олон төрлийн материалууд агуулсан номыг хүүхдэд өгөөрэй.

• 6-12 сартайд нь хүүхдээ өвөр дээрээ суулган, номоо харж, хүрэх боломжийг хүүхдэд олгоорой. Энэ үед хуванцар, картонон зурагтай ном өгч, зургийг давхар тайлбарлан, номоо уншиж байгаарай. 

Эх сурвалж: /www.cabaneaidees.com